سياسة الخصوصية

آخر تحديث: ١٤ أكتوبر ٢٠٢٦

«آخر النيل» لعبة على الموبايل، بتتلعب من غير حساب ومن غير نت. اللعبة المحفوظة بتفضل على موبايلك، إلا لو اخترت تستخدم ألعاب جوجل (Google Play Games) زي ما تحت. الصفحة دي بتشرح البيانات القليلة اللي ممكن تطلع من اللعبة، وإمتى.

اللعبة من تطوير Mohamed Tanash (LinkedIn)، والمسؤولية عن البيانات دي على مطوّر اللعبة. لما الصفحة دي تقول «إحنا» يبقى قصدها مطوّر اللعبة.

بيانات الاستخدام وتقارير الأعطال

أول مرة تفتح اللعبة بتوافق على شروط الاستخدام وعلى السياسة دي، وبتختار: تلعب وبيانات الاستخدام شغّالة، أو تلعب من غيرها. اللعبة بتشتغل كاملة في الحالتين. لو اخترت إنها تشتغل، اللعبة بتبعت الحاجات دي لحد ما تقفلها من الإعدادات:

• بيانات استخدام، عن طريق Google Analytics for Firebase:
  • أنهي شاشات بتتفتح.
  • اللي بيحصل في اللعب، زي: لعبة جديدة وطريقة اللعب، والمستوى، والأيام، والمهمات، والخناقات، والتفتيش والصنعة والنوم والأكل، والموت وسببه، والإعدادات اللي بتغيّرها، والحفظ لو فشل.
  • انت فين في اللعبة: اليوم، وحتة القصة، وقد إيه لعبت بالدقايق.
  • رقم عشوائي خاص بتثبيت اللعبة على موبايلك.
  • نوع الموبايل ونسخة أندرويد، ولغة اللعبة ونسختها.
  • البلد أو المنطقة بشكل تقريبي، وده جوجل بتعرفه من عنوان الـ IP.
• تقارير الأعطال، عن طريق Sentry: لما اللعبة تقفل أو يحصل فيها خطأ، بيتبعت تفاصيل الخطأ، ونوع الموبايل ونسخة أندرويد، ونسخة اللعبة، وانت فين في اللعبة (اليوم، والمستوى، والمكان).

إحنا مش بنجمع اسمك، ولا رقمك، ولا مكانك الحقيقي، ولا جهات الاتصال، ولا الصور، ولا رقم الإعلانات (Advertising ID). بس البيانات مش مجهولة تمامًا: مربوطة برقم التثبيت العشوائي اللي فوق. اللعبة مفيهاش إعلانات، ومش بنبيع أي بيانات.

تقدر تقفل ده أو تفتحه في أي وقت من: القايمة ← الإعدادات ← «بيانات الاستخدام».

ألعاب جوجل Google Play Games (اختياري)

لو موبايلك داخل بحساب ألعاب جوجل، اللعبة تقدر تدخّلك بيه، وتقدر كمان تسجّل دخول من القايمة. وبعدها بس:

• درجتك في وضع النجاة، يعني عدد الأيام اللي عشتها، بتتبعت للوحات الصدارة، واللي بتعرض اسمك وصورتك في ألعاب جوجل لباقي اللاعبين زي ما جوجل بتعرضهم.
• الإنجازات اللي بتكسبها بتتبعت.
• نسخة من لعبتك المحفوظة بتتحفظ في الحفظ السحابي بتاع ألعاب جوجل، عشان تكمّل من موبايل تاني. وبتتمسح لما ناجي في وضع النجاة يموت.

ده كله بتمسكه جوجل، بشروط خصوصية جوجل وشروط ألعاب جوجل. ولو مسجّلتش دخول مفيش حاجة منهم بتتبعت واللعبة بتشتغل زي ما هي.

الملاحظات اللي بتبعتها

لو بعتّ ملاحظة أو بلّغت عن مشكلة من القايمة، بيوصلنا:

• اللي كتبته.
• إيميلك، لو كتبته.
• نسخة اللعبة ونوع موبايلك ومكانك في اللعبة، ولو شلت العلامة دي ماتتبعتش.

الملاحظات بتتبعت عن طريق Sentry، أو بالإيميل.

مين بيشوف البيانات، ولحد إمتى

• بس إحنا، والخدمتين اللي بنستعملهم: Google (Firebase)، وSentry. الاتنين بيمسكوا البيانات بالنيابة عننا وبشروطهم:
  • خصوصية جوجل
  • خصوصية Sentry
• ولو استخدمت ألعاب جوجل، جوجل كمان بتمسك اللي بيتبعتلها (فوق) بشروطها.
• بيانات الاستخدام بتتمسح بعد ١٤ شهر بالكتير.
• تقارير الأعطال بتتمسح بعد ٩٠ يوم.

حقوقك

تقدر تطلب نسخة من بياناتك أو تطلب مسحها، على support@nilesend.com. ولو مسحت اللعبة من الموبايل، اللعبة المحفوظة بتتمسح معاها. أما الدرجات والإنجازات والحفظ السحابي فجوجل هي اللي ماسكاها: تقدر تمسح بيانات ألعاب جوجل بتاعتك من إعدادات تطبيق Play Games.

الأطفال

اللعبة مش موجّهة للأطفال تحت ١٣ سنة.

التغييرات

لو السياسة دي اتغيّرت هننزّل النسخة الجديدة هنا، ومكتوب تاريخها فوق.